Görməli yerlər

Bənzərsiz təbii gözəlliyi, mədəni-tarixi abidələri ilə turistlərin sevimli məkanı olan Quba Bakıdan 168 km məsafədə, Böyük Qafqazın – Şahdağın şimal-şərq yamaclarında, dəniz səviyyəsindən 600 metr yüksəklikdə, Qudyalçayın sahilində yerləşir. 

Vaxtilə Qubaya fransız yazıçısı Aleksandr Düma, rus yazıçısı Bestujev-Marlinski, məşhur Norveç alim-səyyahı Tur Xeyerdal səyahət etmişlər. 

Qubada Təngəaltının şəffaf qayalarına bürünmüş və hündürlüyü 75 metrə çatan daşqın sularla əhatə olunan möcüzəli Afurca şəlaləsi, Xınalıq kəndinin əhalisinin özünəməxsus dili, fərqli adət-ənənələri və qonaqpərvərliyi, yəhudilərin kompakt şəkildə məskunlaşdığı Qırmızı qəsəbə, Təngə dərəsi bənzərsiz maraq oyadır. Quba xalçaçılıq məktəbinin füsünkar xalçalarını görmək hər bir xalça həvəskarının arzusu olduğu kimi, yerli mətbəxin yeməklərindən dadmaq da hər bir qurmanın istəyidir. 

Əlbəttə, bütün qonaqlar ermənilər tərəfindən 1918-ci ildə Azərbaycan torpaqlarında həyata keçirilən kütləvi qırğınlar nəticəsində həlak olan minlərlə azərbaycanlının xatirəsinə ucaldılmış Quba Soyqırımı Memorial Kompleksinə də üz tutur. Kompleks 2007-ci ildə rayon stadionunda aparılan təmir-tikinti işləri zamanı aşkar edilmişdir. Burada, həmçinin tarixi sənədlər və faktların sərgiləndiyi muzey fəaliyyət göstərir.

Çuxur hamam Azərbaycan memarlığının incilərindən biridir, XVIII əsrdə qırmızı kərpicdən tikilmiş hamam tarixin həm yaxşı, həm də bəzi faciəvi səhifələrini özündə əks etdirir. Hamamda məşhur fransız yazıçısı Aleksandr Düma çimib. 150 il sonra isə onun nəticəsi ulu babasının gəzdiyi yerləri yenidən ziyarət edib.

Yerli əhalinin söylədiyinə görə, 1918-ci ildə ermənilər Qubada törətdikləri soyqırım zamanı insanları Çuxur hamamda buxarda boğub, daha sonra isə onları çalaya töküblər.

Eləcə də Tağlı körpünü yaddan çıxarmaq olmaz. Körpü XVIII-XIX əsrlərdən bu günümüzə gəlib çatan tarixi abidələrdəndir. Abidə on dörd tağdan ibarətdir, uzunluğu 275 metr, eni 8 metrdir və bişmiş qırmızı kərpicdən inşa edilmişdir. Körpü Azərbaycanda XIX əsrdə inşa edilmiş belə konstruksiyaya malik yeganə abidədir.

Quba həmçinin turistik baxımdan Azərbaycanın paytaxtı Bakıdan ən yaxınlıqda yerləşən beşulduzlu “Quba Palace” oteli ilə məşhurdur.